صباح الفل ..ممكن أحبطك بسؤال مفاجئ ؟؟
إيه آخر كتاب قريته ؟؟ طبعا غير كتاب الفزيا بتاع تالتة ثانوي ؟ ..خلي الأجابة لنفسك لغاية آخر الموضوع .
خد عندك حبة الأحصائات دي .
* تعرف حضرتك إن كل ما كتبه العرب مجتمعيييييين من كتب خلال المئة عام الأخيرة لم يتجاوز ما كتبه الأسبان خلال الخمس أعوام الأخيرة .
* طيب تعرف إن مجهود العرب في التأليف والكتابة لا يتعدى 0.03% من مجهود العالم كله ؟؟
* تعرف حضرتك إن أجعص وأضخم كتاب بيوزع في مصر بيوزع 3 آلاف نسخة حسب احصائية مكتبة الشروق ( اكبر ناشر مصري ) ..يعني أقسم بقى على السبعين مليون أنا عن نفسي قسمتها طلعت 0.00000428 فضيحة صح ؟
* تعرف إن أستاذ مصطفى مشهور المرشد السابق للأخوان بيقول إن اللي يقرا في اليوم الواحد أقل من خمسين صفحة يبقى أنسان مقصر في حق نفسه ودينه ووطنه ....أنا مش عايز أحلف إن فيه ناس ما قرتش الخمسين صفحة دول مجتمعين في حياتها .
* تعرف إن الأديب البرازيلي باولو كويليو قال إنه كان نفسه يتعلم العربي و داخ السبع دوخات وملقاش كتاب عربي واحد في العديد من دول العالم اللي زارها .
* تعرف إن 40% من العرب الذين يدخلون الأنترنت لا يتعدى أستخدامهم لشبكة الأنترنت سوى الدخول على المواقع الإباحية .
* وإن حوالي80% لا يتعدى الأستخدام سوى الشات والأغاني والألعاب
ياااه ومن ده كتير . انا أعرف خريجين هندسة وطب ما بيعرفوش يركبوا جملة عربية على بعضها صحيحة ..وأعرف واحد مهندس طلبت منه يكتب لي موضوع كده في ورقة وش وظهر طلعتله أكثر من 15 غلطة إملائية مهندسسسسس يعني كلية قمة .
والمشكلة إن الشباب مش عايز يقرا ومش عايز يفهم ومنهم طبعا الشباب المتدين اللي حالته بقت تقرف تكلم الشاب من دول تلاقيه عمال يردد شوية كلام حافظه ولا هوا فاهم حاجة في حاجة وعامل نفسه خلاص فهامة .
أنا عايز أضرب لحضرتك مثل ..مجلس الوزرا عندنا فيه 34 وزير ..ممكن لو سمحت تقولي أسم عشر وزرا منهم ؟؟
طيب بلاش دي نجيب محفوظ اللي أنت طبعا عمال تفخر بيه أول عربي أخد جايزة نوبل
..تعرف تقولي سبع كتب هوا ألفهم ؟؟ ...حرام يا جدعان ده الراجل بقاله سبعين سنة بيكتب كتب . وما حدش عارف هوا ألف إيه ؟
إحنا فعلا جيل ضايع لأننا جيل لا يقرأ ..ومادام الأنسان لا يقرأ فهو أنسان ضايع ..تقريبا هو شيء زائد على الحياة
إحنا عمالين نقول الشباب مغيب ليه الشباب ضايع ليه وعمالين نقول الغرب هو اللي بوظ شبابنا الغرب هوا اللي عراهم الغرب هوا اللي وداهم في داهية ...طيب والغرب ما خلاكومش تقروا .
طيب ما أنا شايف شباب زي الفل أهو قدامي من اللي بيعلقوا في الموقع وأكبر عدو للغرب ومتدينين ملتزمين ومع كده ما
بيقروش ونص كلامهم غلطات املائية..مال الغرب بقى مال المؤامرة بقى ..إحنا اللي وكسنا نفسنا .
تعرفوا حضراتكم برنامج " ستار ميكر " اللي جذب أكثر من 40 مليون مشاهد على مستوى الوطن العربي ؟ البرنامج ده أصله
أنجليزي ..أسمه بيج برازر ( الأخ الكبير أو زعيم الشلة ) لكن مع كده كان في أنجلترا في نفس الوقت اللي بيتعرض بيج بروزر قناة البي بي سي عملت برنامج منافس إسمه بيج ريديرbig reader " " ( القارئ العظيم أو زعيم
القراء ) وعملت فيه تصفيات ما بين 100 كتاب والخمس كتب اللي فازت نزلت في المعارض والمكتبات بخصم كبير دعما من البي بي سي .
شفتم بقى مين اللي وكسنا ..إحنا اللي وكسنا نفسنا وضيعناها ...مش عارف أساسا في حد وصل لغاية كلامي ده ولا لأ ..تلاقي الناس زهقت وخلعت . ما محدش بقى بيقرا خلاص.
عرفتم ليه إسرائيل يا جماعة وصلت القمروإحنا القمر بتاعنا لسه على الباب وحتى مش عارفين ..نرد الباب ولا نناديله ؟؟ وآه يا أما
موضوع: صباح الأمية 
السبت 26 ديسمبر 2009, 11:15 pm
