[scroll]
يوسف بطرس ياابن الغالي لو تسمح لي اعك شوية
وان مسمحتش الله يعوض ع اللي حايجري بالتبعية
انت وزير الدولة وحقك يبقي قرارك فوق رقبينا
ما احنا ولاد البطة السودة اللي عليهم روبة وطينة
انت عليك تركب وتدلدل رجلك فوق الخلق ياسيدي
او تفرسنا بأي ضريبة وتجرجرني وتملك ايدي
جاي تتقنصل علي شقتنا اللي بنيتها بعرقي ودمي
وتقول حاخد عنها ضريبة خدها ياسيدي وزود همي
ليه بتعكر دمي يافندي وتبهدلنا وتمحي الاسرة
علشان ادفع وادفع وادفع وادفع عمري واموت م الحسرة
مين بالذمة في كل زمايلك جاب اقراره وقالك عندي
مين راح يدفع منهم"ميلم" قول وانا راضي بالذمة يافندي
طب ايه رأيك انا مش دافع! ياللا احبسني وحدد سيري
واحبس غيري وغيري وكوش علشان يبقي في ايدكو مصيري
والله انا خايف تعملوا فردة ع الاموات والناس الماشية
فكرة جريئة ياريت تعملها علشان تسعد باقي الحاشية
حلمك واسع والله ياباشا بس انشالله حايبقي حقيقة
اوعي تخاف م الشعب الطيب ما انتو الصفوة واحنا البيئة